" TRECE AÑOS EL TENÍA "
Trece años el tenía
y en casa pasaben fame...
A so madre y decía...
Nun llores , tranquila madre
que voy a dir para la mina
pa que na , a ti te falte...
Fiyu miu de mió vida ,
ten procuru que ya sabes...
To padre morrió na mina
enterrau nun derrabe...
El rapaz ya lo sabía ,
más ye más negra la fame
que negra la sobreguía...
Y al relevu de la tarde
con la llámpara encendía
que heredara de so padre ,
fué aquel rapaz pa la mina
pa una rampla y de güaje ,
que ye la categoría
que tienen los principiantes...
La llámpara rellucía
como un lluceru en sos manes
y a la muerte nun temía...
Temía más a la fame !
Un picaor el sería ,
nun y faltaba coraxe ,
ni valor , ni valentía...
Solo pensaba en so madre
y en la panera vacía ,
de Samartin y patates ,
de fabes y de fariña...
Cinco hermanos esperaben ,
en sin plumar entabía
como gurriones en trance
y con gran algarabía ,
besar al hermanu grande
con la cara ennegrecía ,
que yera como so padre
el jefe de la familia...
Siete boques pa un güaje ,
ruina yera la paguina
pero había que arreglase
y cinchar bien la petrina ,
pensando ' naquella madre
que lloraba la prubina ,
al ver al fiyu llavase
en un balde na cocina ;
con un filu nes pestañes
del que el güaje presumía
negru como ' lazabache
de carbón y dinamita...
Nun llores , tranquila madre
que ya conocí la mina
y hoy hablé con mió padre ,
que lloraba de allegría
al veme entrar tan campante ,
per aquella galería
donde tapau nun ballarte
salió pa siempre el un día...
Nun yera ningún cobarde
y picaor el quería ,
ser lo más presto que tarde
pa sacar a so familia
de la angoxa y de la fame...
Ye una historia de la mina
entrañable como tantes !
OLEGARIO - 10 - 6 - 2021
NAVALIEGU - LLAVIANA - ASTURIES.
