L’ALBORIADA de emilio palacios
Les florines del güertu
de la Rosalba,
riégales Maruxina
al riscar l’alba.
Y, ente les flores,
la más gaya é la neña
de mios amores...
Amapólase’l cielo;
los paxarinos
salúdenla con dolces
gorgorotinos...
Una abeyina
pica miel na so boca,
¡y fuxe aína...!
Desgañítase un gallu
cabo la era.
Blinca ufanu un xatín
ena praera...
Runrún d’abeyes
(el sol, detrás d’un monte
paciendo estrelles).
Y la Quintana
enllénase d’arumes
de la mañana...