EL JILGUERU

OCHOA, Valentín
(Antón el Chiova)(1879–1951) Alcuñu lliterariu de Valentín Ochoa, iguáu como anagrama del so verdaderu nome. Nació nel barriu Los Nozalones de Sama, Llangréu, en 1879. Estudió na Escuela de Capataces de Mieres, onde coincide col futuru poeta en llingua asturiana Daniel Albuerne. Col títulu de Facultativu ingresa nel añu 1900 na fábrica felguerina de Duro, empresa a la que va tar vinculáu tola so vida profesional hasta la xubilación en 1948. Compatibilizó esti trabayu col de profesor en delles academies de Llangréu y particular.
Republicanu y admirador del primer Lerroux, fundó dende primeros de sieglu periódicos como El Porvenir de Llangréu, El Concejal (órganu de la Fraternidá Republicana de Llangréu) y el semanariu El Nalón(subtituláu "Semanariu republicanu"). Fue un activu militante de la causa republicana hasta mediaos de los años trenta, qu’abandonó l’actividá política por desalcuerdos cola isquierda llangreana. Al acabar la guerra civil, quedó ensin empléu y sufrió procesu xudicial acusáu de pertenercer a la Masonería. La mediación de persones influentes de Llangréu valió-y pa recuperar el so empléu na fábrica de la Duro y pa nun ser condenáu pol Tribunal Especial pa la Represión de la Masonería y el Comunismu de Madrid. Morrió en Xixón en 1951.
Como escritor en llingua asturiana, Antón el Chiova gozó d’abonda popularidá nel so conceyu natal y en toles cuenques mineres. La so obra en versu, publicada prácticamente toa en portfolios de fiestes y periódicos llocales, nun se recoyó en llibru hasta 1974, ventitrés años depués de la so muerte, nuna antoloxía preparada pol tamién poeta n’asturiano José León Delestal. En 1994, la Conseyería de Cultura dedicó-y la so Selmana de les Lletres, patrocinando la publicación d’una amplia amuesa antolóxica de la so obra poética n’edición de Pablo Antón Marín Estrada.
De la so obra, mayormente festiva y de calter humorísticu, Marín Estrada resalta’l conteníu políticu de dalgunos de los sos poemes, como espeyu de la so ideoloxía de republicanu d’isquierdes: el mundu del progresu, la industrialización, les condiciones de la xente obrero o la cellebración del advenimientu de la II República son dellos de los temes trataos nos sos versos que lu asitien nun llugar estremáu de la mayoría de los sos contemporanios.
 
LA LLANGREANA
Ye una moza guapina, engañadora,
la que vemos lus llunes dir a Sama
y tien en too Asturies muncha fama
de ser bondosa, fiel, trabayadora.
Lo mesmu carbonera qu’aguaora
o lo qu’otru llabor cualquier entama,
yá sea de criá, yá sea d’ama,
ha paecete siempre encantadora.
Vesla pasar garbosa, gayaspera,
golviendo a munchus lloca la mollera
cuandu crucia les calles tan xentil;
quedandu los probinos anaguandu,
al mirala que pasa ximielgandu
con tantu aire y gracia so mandil.
(19l5)

ACRÓSTICU

Si a puntu yo t’encontrás
Al pie de ti me tendrás
Galantiándote gozosu.
Recontra ¡si llograrás
Al fin faceme dichosu!
Rellatando mio pasión
Inflamase’l corazón
Olvidandu mios pesares.
Está yá pensando Antón:
Si llográs que tú lu amares!
Tengu yá mieu que la xente
Repare qu’al vete enfrente
A mi éntrame temblor;
Dirán: pos vaya un valiente
A quien lu mata l’amor!