CASTAÑÓN GONZÁLEZ, María Elvira
(1922-1989)
Nació la poeta asturiana María Elvira Castañón en Caborana (Ayer) el 29 de setiembre de 1922 y fue a morrer el 9 de xineru de 1989.
Mui relacionada coles manifestaciones culturales mierenses, nun había álbum de fiestes o revista comarcal que nun llevare dalguna poesía d’esta popular autora. El selmanariu Comarca fue la publicación onde más davezu collaboró.
Ganadora de munchos premios poéticos, ente ellos el que lleva’l nome de Teodoro Cuesta, la so obra nun se recoyó en llibru hasta 1989, cuando la editorial avilesina Azucel asoleya póstumamente Llucerín del Cielu, una collecha temáticamente conxuntada al rodiu del nadal. El Conceyu d’Ayer publicó en 1990 la Antoloxía poética. Aller–La Mina y el Mar.
NUN LLORES, MIO NENU
Cantaba Mariya,
cantaba–y al nenu
y el nenín xemía
sin coyer el sueñu.
Ea, ea, ea...
Nun chores, mió nenu,
dúrmite lluceru
que los paxarinos
ya durmin nel ñeru
pa de mañanina
venir en un vuelu
a canta–y endeches
al rei de los cielos.
Dúrmite, mio vida,
dúrmite lluceru
que los anxelinos
toos se durmieron;
San José benditu,
que ye carpinteru,
fexo una cunina
pa que durma el nenu
y mientres lu arrolla
con paz y sosiegu
cantaba–y Mariya
el canciu melgueru:
Dúrmite, mio vida,
nun chores, mio nenu,
que si chores muncho
estropies los güeyos.
